انٹرنیشنل کرکٹ کونسل (آئی سی سی) ون ڈے ورلڈکپ 2023 کے آغاز سے قبل تقریباً ہر ٹیم فٹنس کے مسائل سے پریشان ہے، آسٹریلیا، پاکستان، بھارت اور انگلینڈ جیسی بڑی ٹیموں میں بھی انجریز کی بھرمار ہے۔
بھارت کی میزبانی میں کھیلے جانے والے ون ڈے ورلڈکپ کے 13 ویں ایڈیشن میں دو ہفتے سے بھی کم وقت رہ گیا ہے۔ ایسی صورتحال میں جب ٹیمیں اپنے ورلڈکپ اسکواڈ کا اعلان کر رہی ہیں یا کرچکی ہیں، انہیں اہم کھلاڑیوں کے فِٹنس مسائل کا سامنا ہے۔
پاکستان، آسٹریلیا، جنوبی افریقہ کے بعد اب اِس صورتحال سے حال ہی میں متاثر ہونے والی ٹیم سری لنکا ہے۔ سری لنکن ٹیم کو یہ دھچکا اُس وقت لگا جب آج لیگ اسپنر وانندو ہسارنگا انجری کے باعث ورلڈ کپ سے باہر ہو گئے۔
وانندو ہسارنگا ہیم اسٹرنگ انجری کا شکار ہیں اور اسی انجری کی وجہ سے وہ ایشیا کپ بھی نہیں کھیل سکے تھے۔ ری ہیب کے دوران وانندو ہسارنگا کی تکلیف میں اضافہ ہوا ہے۔
انجرڈ کھلاڑیوں کی بات کی جائے تو نیوزی لینڈ کے ٹِم ساؤتھی، جنوبی افریقی کے اینرک نورٹجے، پاکستان کے نسیم شاہ، بھارت کے اثر پٹیل، آسٹریلیا کے ٹریوس ہیڈ اور انگلینڈ کے مارک ووڈ اور عادل رشید شامل ہیں۔
