پچھلے 8 ماہ سے بانی پی ٹی آئی سے کوئی ملاقات 2 فرشتوں کے بغیر نہیں ہوئی و ہ ہمار ی گفتگو سنتے رہتے ہیں،اسلام آباد ہائیکورٹ میں میڈیا سے گفتگو
پاکستان تحریک انصاف کے رہنماءشیر افضل مروت نے کہا ہے کہ بانی پی ٹی آئی سے ملاقات کے دوران ایک فرشتہ بانی پی ٹی آئی اور ایک ہمارے ساتھ موجود ہوتا ہے، وہ اہلکار ہماری تمام گفتگو سنتے ہیں،اسلام آباد ہائیکورٹ میں پیشی کے بعدمیڈیا سے گفتگو کرتے ہوئے انہوں نے کہا کہ پچھلے 8 ماہ سے بانی پی ٹی آئی سے کوئی ملاقات 2 فرشتوں کے بغیر نہیں ہوئی۔
الیکشن کے دنوں میں ہمارے کاغذات لے لئے جاتے تھے، بہت ساری اہم معلومات خان صاحب تک نہیں پہنچنے دی گئیں، سپریم کورٹ میں ہم نے انتخابات سے متعلق کیس دائر کیا ہے، مینڈیٹ پر جو ڈاکہ ڈالا ہے ہم توقع کرتے ہیں سپریم کورٹ اسے واپس کرے گی۔رہنماءتحریک انصاف کا مزید کہنا تھا کہ عمر ایوب سے کوئی اختلافات نہیں، جب بھی ملوں گا بغلگیر ہو کر ملوں گا۔
ایک صحافی نے سوال کیا کہ بڑی تعداد میں آزاد امیدوار سنی اتحاد کونسل میں شامل نہ ہو سکے، یہ کدھر جائیں گے ، شیرافضل مروت نے جواب دیا کہ یہ سنی اتحاد کونسل میں ہی جائیں گے۔ قانون کے مطابق وکیل اور موکل کے درمیان بات چیت میں کوئی حائل نہیں ہو سکتا، عدالت نے حکم دیا ہے کہ آئندہ بانی پی ٹی آئی اور وکلاءکی ملاقات کے دوران گفتگو کوئی نہیں سنے گا۔
شوکاز نوٹس میرے اپوزیشن لیڈر بننے کی راہ میں رکاوٹ پیدا کرنے کیلئے دیاگیا۔انہوں نے کہاکہ ہفتے میں صرف 2 ملاقاتیں ہو سکتی ہیں، تاہم عدالت نے جیل حکام کے اس موقف کو مسترد کر دیا ہے، عدالت نے پیر سے ہفتے تک بانی پی ٹی آئی سے ملاقات کرانے کا حکم دے دیا ہے۔ خیال رہے کہ آج اسلام آباد ہائیکورٹ نے عمران خان کو وکلاءسے اکیلے میں ملاقات کی اجازت دیدی،ہائیکورٹ میں بانی پی ٹی آئی کی وکلاءسے پرائیویسی اور اکیلے میں ملاقات کیلئے دائر درخواستوں پر سماعت ہوئی۔
ہائی کورٹ نے جیل انتظامیہ کو پرائیویسی میں ملاقات کرانے کا حکم دیتے ہوئے کہا کہ وکلاءکی ملاقات کے دوران کوئی اہلکار کھڑا نہیں ہوگا۔عدالت نے وکلاءکو بانی پی ٹی آئی سے ملاقات کے دوران کاغذات اور پینسل لے جانے کی بھی اجازت بھی دیدی تھی۔
