بھارت کے شہر حیدرآباد میں آج پاکستان اور آسٹریلیا کے درمیان کھیلے جانے والے وارم اَپ میچ میں فاسٹ باؤلر شاہین شاہ آفریدی کے پلیئنگ الیون میں شامل ہونے کے امکانات روشن ہیں۔
انٹرنیشنل کرکٹ کونسل (آئی سی سی) ون ڈے ورلڈکپ کے آغاز سے قبل وارم اَپ میچز کا سلسلہ جاری ہے۔ آج 3 وارم اَپ میچز کھیلے جائیں گے، پاکستان اپنا دوسرا اور آخری وارم اَپ میچ آسٹریلیا کے خلاف راجیو گاندھی اسٹیڈیم حیدرآباد میں کھیلے گا۔
ذرائع کے مطابق قومی ٹیم کی طرف سے فاسٹ باؤلر شاہین شاہ آفریدی اور شاداب خان آج باؤلنگ کراتے بھی نظر آئیں گے۔ شاداب خان نیوزی لینڈ کے خلاف آخری وارم اَپ میچ میں ٹیم کا حصہ ہونے کے باوجود باؤلنگ نہ کراسکے تھے۔
خیال رہے کہ پاکستانی ٹیم نے گزشتہ روز حیدر آباد میں ڈھائی گھنٹے پریکٹس سیشن کیا جس میں فزیکل ٹریننگ، فیلڈنگ ڈرلز اور نیٹ سیشن شامل تھا۔ اسکواڈ میں موجود تمام کھلاڑیوں نے باؤلنگ، بیٹنگ اور فیلڈنگ سیشنز میں حصہ لیا۔
نیوزی لینڈ کے خلاف 29 ستمبر کو کھیلے گئے وارم اپ میچ میں قومی ٹیم کو 5 وکٹوں سے شکست کا سامنا کرنا پڑا تھا۔
